عمران خان کی نااہلی، اصل وجوہات سامنے آ گئیں

توشہ خانہ کیس کے تحریری فیصلے کی مزید تفصیلات سامنے آگئی ہیں، جس کے مطابق عمران خان کے گوشوارے بینک ریکارڈ سے مطابقت نہیں رکھتے، عمران خان گوشواروں میں کیش اور بینک کی تفصیل بتانے کے پابند تھے لیکن انہوں نے تفصیل نہیں بتائی۔

تفصیلات کے مطابق چیئرمین تحریک انصاف عمران خان کے خلاف توشہ خانہ کیس میں الیکشن کمیشن کے پانچ رکن بنچ کےتحریری فیصلے کی مزید تفصیلات سامنے آگئیں جس میں کہا گیا ہے کہ عمران خان کے مطابق انہوں نے تحائف 2 کروڑ 15 لاکھ 64 ہزار میں خریدے جب کہ کابینہ ڈویژن کے مطابق تحائف کی مالیت 10 کروڑ 79 لاکھ 43 ہزار تھی۔

فیصلے کے مطابق عمران خان کے بتائے گئے بینک اکاؤنٹ کی تفصیلات اسٹیٹ بینک سے منگوائی گئیں جن سے معلوم ہوا کہ مالی سال 2018-19ء کے اختتام پر عمران خان کے بینک اکاؤنٹ میں 5 کروڑ 16 لاکھ روپے تھے، عمران خان کے اکاؤنٹ میں موجود رقم تحائف کی مالیت کی نصف تھی، عمران خان گوشواروں میں کیش اور بینک کی تفصیل بتانے کے پابند تھے لیکن انہوں نے تفصیل نہیں بتائی۔

تحریری فیصلے میں کہا گیا ہے کہ عمران خان کے گوشوارے بینک ریکارڈ سے مطابقت نہیں رکھتے، عمران خان نے وضاحت نہیں دی کہ گوشواروں میں غلطی غیرارادی تھی، عمران خان نے تسلیم کیا کہ مالی سال 2019-20ء میں نہ تحائف ظاہر کئے اور نہ وہ رقم ظاہر کی جو تحائف کی فروخت سے حاصل ہوئی۔

فیصلے میں کہا گیا ہے کہ عمران خان کے بقول تمام تفصیلات ٹیکس گوشواروں میں ظاہر کردہ ہیں لیکن یہ بات طے شدہ ہے کہ الیکشن کمیشن اور ایف بی آر الگ الگ ادارے ہیں۔

الیکشن کمیشن نے فیصلے میں لکھا کہ عمران خان کو سپریم کورٹ کے فیصلے کی روشنی میں ہی نااہل قرار دیا گیا ہے۔

یاد رہے کہ جمعے کے روز توشہ خانہ کیس کا فیصلہ سناتے ہوئے الیکشن کمیشن نے پاکستان تحریک انصاف (پی ٹی آئی) کے چیئرمین اور سابق وزیراعظم عمران خان کو نااہل قرار دیا تھا، عمران خان نے فیصلے کو اسلام آباد ہائیکورٹ میں چیلنج کر رکھا ہے، جس کی سماعت پیر کے روز ہو گی۔