آڈیو لیکس کی تحقیقات کیلئے عمران خان کا سپریم کورٹ سے رجوع

چیئرمین پی ٹی آئی، سابق وزیراعظم عمران خان نے آڈیو لیک کی تحقیقات کیلئے سپریم کورٹ سے رجوع کر لیا۔

تفصیلات کے مطابق عمران خان کی جانب سے عدالت عظمیٰ سے آڈیو لیکس کی تحقیقات کیلئے جوڈیشل کمیشن یا جے آئی ٹی بنانے کی استدعا کی گئی ہے۔

درخواست میں عمران خان نے استدعا کی ہے کہ وزیراعظم ہاؤس اور آفس کی نگرانی، ڈیٹا ریکارڈنگ اور آڈیو لیکس کو غیر قانونی قرار دیا جائے۔

عمران خان نے استدعا کی ہے کہ آڈیو لیکس کی تحقیقات کرا کے ذمے داروں کو سزا دی جائے، حکومت اور متعلقہ اتھارٹیز کو مزید آڈیوز کی لیک روکنے کا حکم دیا جائے۔

چیئرمین پی ٹی آئی کی درخواست میں وزارت داخلہ، وزارت دفاع، وزارت آئی ٹی اور وزارت اطلاعات کو فریق بنایا گیا ہے۔

سابق وزیراعظم عمران خان کی درخواست میں آئی بی، ایف آئی اے اور پیمرا کو بھی فریق بنایا گیا ہے۔