سینئر صحافی ارشد شریف کی حفاظتی ضمانت منظور

اسلام آباد‎ ‎ہائیکورٹ نے اے آر وائی نیوز سے منسلک سینئر ‎صحافی ارشد‎ ‎شریف کی حفاظتی ضمانت منظور کرلی ہے۔

تفصیلات کے مطابق اسلام آباد ہائیکورٹ کے چیف جسٹس اطہر من اللہ نے سینئر صحافی ارشد شریف کی حفاظتی ضمانت کی درخواست پر سماعت کی۔

واضح رہے کہ  چیف جسٹس اسلام آباد ہائیکورٹ نے صحافی ارشد شریف کی درخواست آج رات ساڑھے گیارہ بجے سماعت کیلئے مقرر کی تھی۔

صحافی ارشد شریف کے خلاف حیدر آباد میں مقدمہ درج ہے، جو ریاستی اداروں کے خلاف گفتگو کرنے کے باعث درج کیا گیا۔ پولیس کا کہنا ہے کہ  طیب حسین نامی نوجوان نے گزشتہ روز ارشد شریف کیخلاف مقدمہ درج کرایا ہے۔

دوسری جانب اے آر وائی نیوز سے منسلک صحافی صابر شاکر پر بھی  اداروں کیخلاف گفتگو کرنے پر میرپور خاص میں مقدمہ درج کیا گیا ہے۔ صابر شاکر پر مہران پولیس اسٹیشن میرپور خاص میں مقدمہ درج کیا گیا۔ مقدمہ محمود حسن نامی شہری کی مدعیت میں درج کیا گیا ، جس میں 153، 505 اور 131 کی دفعات شامل کی گئی ہیں۔

عدالت نے حفاظتی ضمانت پیر تک منظور کرتے ہوئے صحافی ارشد شریف کو  ذاتی حیثیت میں پیش ہونے کا حکم دے دیا۔کیس کی مزید سماعت پیر تک ملتوی کر دی ہے، تب تک پولیس ارشد شریف کو گرفتار نہیں کر سکے گی۔

چیف جسٹس نے آئی جی اور ڈی آئی جی اسلام آباد کو ہدایت کی تھی کہ وہ ارشد 

شریف کی حاضری میں معاونت کریں۔